!!!ما بلااااااااااش

في البدء أراد الأنسان أن يعرف أكثر مما كان مقدر له أن يعرف ... كانت أيه النتيجه؟!
ربنا خلقه عارف الخير بس, و كمان عارف ربنا و عنده كل اللي هو محتاجه, ليه كان عايز يعرف أكتر أو بمعنى أدق عايز يعرف اللي مش مفروض يعرفه. حتى مع التحذير العادل اللي أخده, قرر بغباء أنه يعرف أكتر من غير حساب للعواقب و كلنا دفعنا الثمن

أسمحلي أطلع بأستنتاج دلوقتي و أثبته بعد كده على مهلي: يعني "عدم معرفه مالايجب معرفته و معرفه بس اللي محتاجين نعرفه هو الجنه بعينها". مش متفق معايا!! طب هأقنعك ...

كونفوشيوس قال "لا تنظر لما لا يليق, لا تنصت لما لا يليق, لا تتكلم بما لا يليق" و أخذ عن حكمته مثل "القرود الثلاثه الحكيمه"

http://en.wikipedia.org/wiki/Three_wise_monkeys

هأسمح لنفسي أضيف "لاتنظر إلي ما لا تحتاج أن تراه, لا تنصت إلى ما لا تحتاج لسماعه و لا تتكلم بما لا تحتاج لقوله"

دخلت شله جديده, أيه أحسنلك ... تحاول لحد ما تعرف كل القصص القديمه و كل المشاكل التاريخيه, "بيسو" متخانق مع "كيكو" و "بيبو" فرقع "جيجي"؟ "توتو" كان صاحبنا زمان و باعنا أو بعناه و "توتا" ليها ماضي مش ممكن ننساه ... وللا أحسنلك تعرف النهارده و بكره و بس, تعرف الناس ببساطه زي مامقدمين نفسهم ليك, و تعرف عنهم اللي باين في معاملتهم معاك, مش يمكن اللي فات ده كان ليه ظروفه, مش يمكن اتغيروا, مش يمكن ندموا؟ ليه تقفل نفسك عنهم و تسد نفسك منهم و تحكم على ماضيهم اللي حتى ربنا بيغفره و ينساه ... أقتنعت. لسه, طيب خد عندك ...

ربنا كرمك بوظيفة أحلامك بالمرتب اللي كان نفسك فيه, حماسيه جدا, متفصله عليك, بالضبط زي ما تمنيت ... لازم تعرف اللي كان قبلك إستقال و للا أترفد و ليه, طب مرتبه كان كام؟ أيه ده أكتر منك ب 17 جنيه طب و لما مره إتخانق مع المدير قاله أيه؟ و إتقاله أيه؟... أيه الشغلانه البايخه اللي مش جايبه همها دي. قفشت!!! ولا تفتكر كده يعني أنت خبرتك زادت لما عرفت

يعني كان لازم لما أخدت الزياده ال8% اللي كنت مستنيها بفارغ الصبر تسأل و تدور فتعرف أن زميلك اللي شعره أبيض اللي شغال بقاله 63 سنه في نفس المكان ده أخد زياده 9.5% ... فجأه حسيت بالظلم, الشركه دي بتسرقك؟! الزياده فجأه بقت مش مكفيه و كل حماسك و تشجيعك للسنه الجديده في الشغل إختفى!!!

أديك مثل دراماتيكي عن كده؟ حبيت البنت دي (أو الولد ده) بجد ... حصل حاجات مالهاش معنى؟ ... إتقاللك إبعد و مش هينفع من غير سبب معين أو موقف له معنى؟ ... لازم يعني تحاول تعرف ليه و إزاي, لازم تسمع بودانك حاجات أغلب الظن هتجرحك, غاوي يعني تعذب نفسيتك و تكرمش مشاعرك؟ تحت شعار "لازم أعرف", و "مش هأرتاح ولا يهدالي بال إلا لما أعرف"!

عايز مثل نفساوي عن كده؟ قابلت الشخص اللي بتحترمه ده, اللي ينفع ينصحك في حاجات كتير و كمان ممكن يكون مثل أعلى ليك. ساعدك و أرشدك كتير بالفعل ووفر عليك وجع تجارب و إحباطات فشل ... وفر عليك أنك تتعلم كل حاجه بالغالي. ليه عايز تقرأه أفكاره و تعرف كل أسراره؟ عرفت؟ سمعت و شفت أنه إنسان ضعيف زيك و يمكن أضعف؟! عرفت أنه الحاجات اللي بينصحك بيها أوقات هو نفسه بيغلط و يتلخبط فيها؟ مبسوط؟ هتعرف تحترمه و تأخد رأيه في الإعتبار تاني؟ طب هتعمل أيه؟ هتعيش علي رأسك ... مالكش كبير و لا ناصح؟ ... لأ ناصح! فخور أوي أنك عرفت, و أيه الفايده من المعرفه دي؟

حصل حاجه في مجتمعك بين أتنين تعرفهم و بتعزهم؟ ليه تعرف كل التفاصيل؟ مش يمكن التفاصيل تحرجك! تجرحك! تزنقك بينهم؟ ولما يتطلب منك تتدخل, و لما حد يسألك عن اللي حصل اللي مش عايز تحكيه. أكدب بأه أو خليك سخيف و قول عارف بس مش هأحكي, و أنت أصلا مش مفروض تكون عارف. إرتحت, أستنرت, حسيت إنك الحكيم الروحاني العالم بكل شئ؟ إحكيلي عن كوابيسك و أحلامك و عن صفاء ذهنك و حلاوة أيامك

عرفت فلانه ماتجوزتش فلان ليه؟ عرفت فلان مشاكله إيه مع مراته (رغم أن الناس بتضرب بيهم المثل) و فلان عمل أيه زمان و هو شاب في سن الضياع؟ عرفت مرتبات كل زمايلك؟ و فضايح كل زميلاتك؟
عرفت نقاط ضعف أهلك و أصحابك؟ عرفت حقيقه فلان اللي كل الناس بتحترمه؟ عرفت إتقال أيه في الموقف اللي ماكنتش موجود فيه؟ و الناس بتقول عليك من وراك أيه؟ عرفت خطايا رجال الدين؟ و فضايح السياسين؟ و لون الملابس الداخليه للفنانين؟

مبسوط؟ مرتاح البال؟ نايم نوم الأطفال؟ بزمتك مش اللي ماتعرفوش مايضركش؟ و عمي الجهل أهون من عذاب المعرفه

هتقوللي الفضول وقود المعرفه و الحاجه أم الإختراع ... سلملي بأه على ليالي الأرق المقرفه و علي كل يوم من راحة بالك ضاع
وعجبي