تحويل الكاكا الي طاقه

و جدتها ... وجدتها ... !!!

صرخت و أنا قايم أجري من علي الكنيف, تمام زي ما "أرشميدس" صرخ وهو طالع يجري من البانيو لما أكتشف قانون الطفو, و اللي ساعده علي حساب "الكثافه" بدقه لأي جسم صلب ... بس أنا أتعلمت من أخطاء من سبقوني و إفتكرت ألبس هدومي قبل ما أنزل السلم و أطلع أجري في الشوارع ... تفصيله بسيطه نسيها العالم الأغريقي العظيم

اللي أنا أكتشفته هو الحلقه المفقوده في ترشيد استهلاك الطاقه و المحافظه علي البيئه, و توليد طاقه نظيفه ...
أنا اخترعت "جهاز تحويل الكاكا إلي طاقه" ... تحسها مش طاقه نظيفه قوي, بس أنت إيش فهمك ... سيب الحكم في المواضيع دي لينا أحنا المهندسين و العلماء و المخترعين

الجهاز فكرته بسيطه جدا, لدرجه أن أي حد منكوا مش مهندس ولا يفهم في الطاقه ... هيحس أن خبرته في انتاج الكاكا كافيه لفهم المبدأ البسيط لعمل الجهاز المدهش ده

أسطوانه معدنيه طولها حوالي متر, و قطرها 2 مترو هتركب علي مواسير الصرف في أخر الماسوره, تحت العماره. بداخل الأسطوانه (اللي حنسميها المحول من هنا و رايح) في "توربينه" صغيره. التوربينه للناس الأدبي و علمي العلوم هي عباره عن ملف من ماده جيده التوصيل للكهرباء ملفوف حول محور معدني علي شكل مستطيل موصل للكهرباء, و يدور الملف بحريه داخل مجال مغناطيسي يولده مغناطيس طبيعي قوي المجال, لما يدور الملف يتولد تيار كهربائي في المحور المعدني, و لا سحر و لا شعوذه.
تسقط حبيبات الكاكا بعنف بفعل الجاذبيه الأرضيه و يصل التسارع لقمته قبل الأرتطام بشفرات التوربينه ... تلف التوربينه, تتولد الكهرباء ... نستخدم أحنا بقه الكهرباء ال... أحم ... نظيفه دي لتشغيل موتور رفع الميه و نبقي حافظنا علي البيئه
تبان سهله, مع البدايه في التطبيق ظهرت الكثير من التحديات:

1. نحتاج تعاون من الناس في ضبط معدل هبوط الكاكا علشان نحصل علي تيار كهربائي مستمر
2. قطر المحول العريض مكلف لكن مافيش غني عنه ... الناس بتأكل فول كتير و يفضل تجنب انسداد المحول
3. أيام معينه في السنه, خاصه في المناسبات, كل الشعب بيأكل فسيخ مثلا أو قلقاس, ده بيحِّمل علي المولد و بيأثر كيميائيا علي القطع المكونه
و تحديات تانيه كتير تعف النفس عن ذكرها ... برضه المخترع مننا لازم يراعي وجود ناس مالهاش في العلم في وسطينا

أنا بدأت في أجراءات تسجيل براءه و نظافة الأختراع الثوري ده, و أتمني أن مصر تكون أول من يطبقه لأن من المعرف أن أنتاجيه مصر السنويه من الكاكا تصل الي 11 ضعف نظيراتها من الدول المتقدمه. و ده يرجع لأسباب كتير هنشرها بالتفصيل أن شاء الله في المذكره اللي هأقدمها لوزارتي "البترول و الطاقه" و "البيئه"

Clean Energy

خلوني أحكيلكم عن حاجه تانيه, تبانلك بعيده عن الهندسه و العلم, اتعلمت من فتره عن "نموذج المراحل الخمسه للتعامل مع الصدمات النفسيه" أو الحزن الشديد لفقدان شخص عزيز أو شئ غالي, حلم مثلا فجأه أكتشفت استحاله تحقيقه.
النموذج ده وضعته الطبيبه "اليزابيث كوبلر" لوصف نماذج متكرره من رد فعل الأنسان

http://en.wikipedia.org/wiki/Elisabeth_K%C3%BCbler-Ross
http://en.wikipedia.org/wiki/Five_Stages_of_Grief

النموذج يقترح 5 مراحل بنمر بيها, غالبا بالترتيب لكن مش شرط
1. الأنكار (من المعروف أن الأنكار هو أكثر رد فعل متوقع من الجنس البشري ... إرجع للبدايه, أبونا أدم مثلا)
2. الغضب
3. المساومه
4. الإكتئاب
5. القبول

في الأنكار بتغلوش و تتخيل أن الخساره ماحصلتش و أن الوضع مؤقت ... بعد كده بتغضب من اللي حصل و من الشخص اللي فقدته نفسه و من ربنا في أوقات, صحيح غضبك مالوش معني لكنها طاقه لازم تخرج.
المرحله التاليه مثيره للإهتمام, المساومه مع الله و الناس, زي مثلا طفل صغير يقول "هبقى كويس, هبقى مؤدب, بس بابا يرجع".
بعد فهم استحاله المساومه و أن استعاده المفقود مش نافعه, تبدأ مرحلة من الأكتئاب و النوح اللي يفضل يكون من النوع الصحي (تعرف أن في حاجه اسمها إكتئاب صحي, لو مش عارف تبقي مسكين و محتاج مساعده الطبيب النفسي الفذ د. "أوهم" انصحك تقرأله كتب أو تسمعله محاضرات)
بعد ما تشبع أكتئاب, بتقبل الوضع و تصدق اللي حصل و "تتصالح مع الفكره" (سمحت لنفسي أقتبس المصطلح ده من "شامي فوري" المحاضر المعروف و الذي يقوم بنشر أفكاره عن بشاعه الزواج كمبدأ ... يا رب إغفر له لأنه لا يعلم ماذا يفعل)

أيه علاقه ده بالطاقه, اسمحلي أفهمك: من المعروف أن "الطاقه لا تفني و لا تستحدث من العدم" يعني أدي الله و أدي حكمته و بالبلدي للأخوه و الأخوات اللي مش علماء: "عد غنماتك يا جحا"

لما تعدي بالمراحل السابق ذكرها, بعد " خساره و فقد" أو "فشل" أو "صدمه" من أي نوع "إنكارك" بيكون زي
مقاومه المواد للكهرباء, و ده بينتج عنه حراره و يضيع طاقه كتير.
"غضبك" ده شكل أخر من الطاقه الغير موجهه و الغير موظفه, بيخرج في الوقت الغلط بالشكل الغلط, يضرك و يضر غيرك و يساهم في جعل و ضعك أسوأ
"المساومه" زي شد الحبل, مجهود رهيب لكن ماتشوفلوش أي نتيجه محسوسه
"الأكتئاب" كأنك و لعت نار و طفيتها بالرمل أو لمبه قويه و دفنتها في التراب, المزيد من أهدار الطاقه

مافتكرش أنك سوبرمان, و أن اقتناعك باللي قلته ده هيخليك تتجنب المرور بالمراحل دي في حاله الخساره, نفسي أتمنالك ماتخسرش أبدا, بس أبقي بضحك عليك. الخساره و التغيير من ثوابت الحياه. لكن هاقترح عليك تتعلم من الفكره البسيطه اللي ورا الأختراع المدهش اللي حكيتلك عنه ... الطاقه اللي هتخرج جايه من و قتك (اللي هو أنقي أشكال الطاقه البشريه و أغلاها زي الضوء كده في الفيزياء) كمان من نفسيتك و أعصابك و روحانياتك لو جاز التعبير, يعني مكلفه جدا, خساره تسيبها تضيع.

أحساسك بالضياع و عدم فهم سبب حصول اللي حصل معاك أكبر دافع للتأمل...
إحباطك فرصه لإعادة النظر و لأكتشاف مواهب جديده أو اعاده اكتشاف مواهب قديمه ...
صحيح الغضب حماقه بس لو أستخدمته في الجيم في رفع الأثقال بيبني العضلات و يقلل الكوليسترول. أو ممكن يتحول لطاقه أبداع مثلا, رسم, موسيقي, كتابه ...
الفشل مدرس خصوصي اجره غالي معلش بس هيعلمك صح و عمرك ما هتنسي اللي أتعلمته لأنه بيستخدم وسائل إيضاح مبتكره...
إحساسك بالرفض يقودك للتعاطف مع الناس ...
شعورك بالعجز و عدم الإستحقاق هو السبيل الوحيد لفهم النعمه ...

خليك دايما متأكد أن كل موقف عدي عليك ثقيل و أثر فيك. معناها انه شكِلَك و علمك و حولك من طاجن قبيح لفازه جميله أو عي الأقل من حته صفيحه مسطحه الي حله غويطه مفيده